Geabaire

Is é Geabaire an chéad chóras seasmhach don chumarsáid bhreisitheach agus mhalartach (AAC), bunaithe ar shiombailí, atá deartha go sonrach don Ghaeilge. Tugann sé rochtain d'úsáideoirí AAC ar bheagnach 7,000 focal. Clúdaíonn sé cláir nasctha a bhfuil téamaí éagsúla iontu. Cuireann sé seo ar chumas úsáideoirí siombailí, focail agus litreacha a chomhcheangal chun teachtaireachtaí a chumadh atá ag dul le struchtúr na Gaeilge. Is féidir le húsáideoirí ansin guthanna sintéiseacha ABAIR a úsáid chun na teachtaireachtaí a rá amach os ard.

D'eascair Geabaire as riachtanas a aithníodh san oideachas lán-Ghaeilge. Sa réimse seo ní raibh teacht ag páistí, a raibh gá acu le AAC, ar chóras cumarsáide seasmhach, iontaofa a bhí deartha go sonrach don Ghaeilge. Tacaíonn Geabaire le raon leathan cumarsáide. Is féidir le húsáideoirí AAC ceisteanna a chur, tuairimí agus mothúcháin a chur in iúl, diúltú, scéalta a insint, caidrimh a thógáil, agus teachtaireachtaí úrnua a chumadh. Trí rochtain a sholáthar ar chóras cumarsáide iontaofa Gaeilge, tacaíonn Geabaire le rannpháirtíocht bhríoch san oideachas, sa bhaile agus i measc phobal na Gaeilge i gcoitinne.